Hobby eller næringsverksemd

For at ein aktivitet skal bli godtatt som næringsverksemd må han bli driven for eiga rekning og eigen risiko, ha eit visst omfang og ei viss varigheit. Han skal over tid vere eigna til å gi overskot.


Kvifor skilja hobby og næring?

Nokre aktivitetar har meir preg av hobby enn av næringsverksemd. Grensa er ikkje definert i lovverket, men ein hobby er skattefri, medan ei næring er skattepliktig verksemd. Forskjellen er med andre ord heilt avgjerande for korleis du skal skattleggjast og om du kan få frådrag for utgiftene. Det er Skatteetaten som avgjer om ein aktivitet er hobby eller næring, men i første omgang må du vurdere sjølv om du skal rapportere aktiviteten din som skattepliktig verksemd.

Når er aktiviteten rein hobby?

Er omfanget av aktiviteten lite og kostnadene omtrent like store som inntektene, kan dette trekke i retning av at du driv ein hobby. Fortenesta på hobbyverksemd er ikkje skattepliktig inntekt.

Ein aktivitet som har preg av hobbyverksemd eller er reine eingongshendingar blir ikkje vurdert som næringsverksemd og kan ikkje bli registrert som enkeltpersonføretak hos Brønnøysundregistera.

Brønnøysundregistera om å drive næringsverksemd

Hobbyen er blitt næringsverksemd

Ein hobbyaktivitet kan over tid bli næringsverksemd. Når det inntektsgivande arbeidet er kome i gang vil alle inntekter som omfattar verksemda vere skattepliktige og alle kostnader gir frådragsrett. Etter at du er godkjend som næringsdrivande, har du bokføringsplikt og du må levere skattemelding for næringsdrivande. Dersom du, etter å ha registrert eit enkeltpersonføretak, får skattemelding for lønnstakarar, må du legge til næringsspesifikasjonen (søk han opp i skattemeldinga sitt søkefelt).

Skatteetaten har utarbeidd ei oversikt over fire vilkår som må vera oppfylt for om ein aktivitet kan reknast som næringsverksemd. Du må sjølv vurdera om du oppfyller alle vilkåra.

Skatteetaten – få hjelp til å finne ut om du er næringsdrivande

Oppstartsperiode

Frå det året du blir vurdert å oppfylle vilkåra som sjølvstendig næringsdrivande, kan du få godkjent inntil dei fem føregåande åra som oppstartsår for verksemda. Dette gjeld berre for dei som startar enkeltpersonføretak. For å få frådrag for tidlegare års oppstartskostnadar, må du sende inn ei ny skattemelding med næringsspesifikasjon for kvart av dei inntil tre siste åra. Er det behov for å endre fire og fem år tilbake i tid kan du be om dette ved å sende inn klage.

Får du endra fastsettinga for oppstartsperioden vil du få frådrag for dei reelle oppstartskostnadane. Det er derfor viktig å ta vare på alle inntekts- og kostnadsvedlegg som er knytt til verksemda frå dag ein.

Skatteetaten om oppstartsperiode og oppstartskostnader for nye næringsdrivande

Etter at du har vorte godkjent som personleg næringsdrivande har du bokføringsplikt og du må levere skattemelding for næringsdrivande.

Skatteetaten – skattemelding for næringsdrivande

Viss du vurderer deg sjølv til å drive hobby, men likevel har inntekt frå ein aktivitet, kan denne framleis vera skattepliktig og skal oppgivast i skattemeldinga. Er du usikker på om du skal oppgi denne inntekta tek du kontakt med Skatteetaten for rettleiing.

Åpne kontaktskjema