Auka satsing på reiseliv
Regjeringa har store ambisjonar for norsk reiseliv framover. For å auke verdiskapinga og utvikle eit meir berekraftig reiseliv styrkjer regjeringa løyvinga til Innovasjon Noreg sitt reiselivsarbeid med 10 millionar kroner.
– Noreg blir eit stadig meir attraktivt reisemål for gjestar frå heile verda. Potensialet for å utvikle eit meir lønsamt og berekraftig reiseliv er stort. Derfor styrkjer vi innsatsen for marknadsutvikling, innovasjon og kompetanse i reiselivet, seier næringsminister Cecilie Myrseth.
Styrkt innsats
Regjeringa vil styrkje marknadsmoglegheitene for norske reiselivsaktørar gjennom heile året. Derfor styrker vi Innovasjon Noreg sitt arbeid med å legge til rette for utvikling i reiselivsnæringa og marknadsføre Noreg som reisemål. I tillegg har regjeringa bestemt at reiseliv blir den femte eksportsatsinga, og innhaldet i denne er snart klar for lansering.
Styrkinga følgjer opp regjeringa sine ambisjonar frå vegkart for reiselivsnæringa, blant anna også oppfølging av «Reiseliv 2030», som gir tilrådingar om korleis reiselivsnæringa gjennom forskings- og innovasjonsaktivitetar kan bli meir lønnsam og berekraftig.
Ei berekraftig utvikling
Ambisjonen om auka verdiskaping i reiselivet føreset at vi også sikrar ei berekraftig utvikling, med tanke på klima, miljø og lokalsamfunn. Det skal vere godt å bu i og besøke reisemåla i landet vårt, og vi må ta vare på natur- og kulturgoda. Regjeringa vil i 2025 halde fram med arbeidet som skal sikre at kommunane får juridisk handlingsrom til å kunne krevje inn eit besøksbidrag, og vil sende eit lovforslag på høyring i haust.
For å legge til rette for auka profesjonalitet, kvalitet og tryggleik knytt til guida reiselivsopplevingar, vil regjeringa følgje opp ved å gi Standard Noreg i oppdrag å utvikle ein Norsk Standard (NS) for guidar, som vil beskrive kva basiskompetanse alle guidar bør ha.
Les heile pressemeldinga her.
Kjelde: Nærings- og fiskeridepartementet, 07.10.2024
